城中鏡：傳楊立門接棒 李宗德續做好自己
之前都講過，公民教育委員會主席李宗德嘅任期將喺明年三月屆滿，近日就傳出其中一個繼任人選係民政事務局前常任秘書長楊立門，相信係睇中佢熟悉政府工作兼形象好，望落又後生。
李宗德（圖）估計楊立門未必肯接任公民教育委員會主席一職。
咁啱日前我哋喺中華慈善藝術家聯會蔡清風嘅藝術展覽上遇到李宗德，佢就話暫未聽聞當局有意更換主席一事，但佢話當局搵番曾經做過政府嘅人擔任該職位並唔出奇，亦都係好合理。
不過，李宗德就話自己會掉轉去諗，楊立門有冇興趣想做佢個位先係問題，事關楊立門啱啱先提早退休，離開政府呢個「熱廚房」，準備全力追夢向音樂方面發展，依家叫佢擔任公職，未知對方反應如何，會唔會「神女有心，襄王無夢」都未知。佢又話做任何嘢或擔任任何位置都一定有人鍾意、有人唔鍾意，所以點都好，佢會繼續做好自己，做多啲對青年有幫助嘅事喎。
