城中鏡：發力保育海洋 眾星好滿足
香港海洋公園保育基金「為海洋發力」宣傳活動喺下周二正式展開，以提高公眾嘅海洋保育意識。保育基金邀得郭晶晶、Charlie楊采妮同Alex方力申，聯同保育基金主席陳晴參與宣傳片同平面廣告拍攝。佢哋穿上由本地時裝設計師及插畫家Zoie Lam@ZLISM設計嘅海洋生物布鞋，演繹中華白海豚、海馬同蘇眉等瀕危海洋生物，以足印呼籲更多人正視海洋垃圾、過度捕魚同污染等問題。佢哋同時呼籲公眾支持保育基金明年三月八日喺數碼港舉辦，全港首個「生態保衞賽」慈善跑，親身體驗海洋生物喺野外受盡威脅嘅處境，以實際行動維護海洋生物多樣性。
郭晶晶（右三起）、方力申、楊采妮同陳晴聯同小朋友穿上充滿動感嘅海洋生物布鞋，呼籲更多人保育海洋。
專程從新加坡返港參與拍攝嘅楊采妮，同小朋友玩得好投契。
陳晴（左）、郭晶晶（右）同小朋友動作一致，非常合拍。
郭晶晶拒食魚翅
保育基金海洋保育大使郭晶晶穿上畫有海馬嘅布鞋演出，佢亦已簽署承諾，拒食魚翅同蘇眉等瀕危嘅海洋生物。得知海馬亦受到同樣嘅威脅，佢話：「坊間傳統認為海馬能補身，視牠們為名貴藥材，令牠們面對被濫捕作藥材的嚴峻威脅。現時全球五十四個海馬品種，已有十一種被列為易危或瀕危級別。然而，喺中醫學上其實有不少植物藥材可代替海馬，我哋並冇必要購買乾海馬，可見加強公眾教育實在刻不容緩。」
擔任保育基金教育大使嘅Charlie，今次專程由新加坡趕返港，演繹中華白海豚。佢感嘆：「海洋係蘊孕生命嘅搖籃，同我哋每一個人嘅生活息息相關，但眼見海洋生態不斷受到人類嘅破壞，海洋生物被過度捕捉，導致海洋生態嚴重失衡！我希望透過呢個有意義嘅活動，令更多人認識海洋保育嘅重要同迫切性，並以實際行動支持，讓我哋嘅下一代能繼續欣賞同享受健康嘅海洋！」
首度同保育基金合作嘅Alex，就演繹瀕臨絕種嘅蘇眉，希望藉此宣傳啟發更多人響應海洋保育，如減少製造垃圾，以及積極參與海岸清潔活動，以保持海洋的潔淨。
