政壇：搞搞政：工聯會派小花落深水埗挑「基」

各政黨政團已就明年區議會選舉磨拳擦掌備戰，其中民協立法會超級議員KK馮檢基身兼深水埗（麗閣）區議員，工聯會社區幹事范國輝由○三年起三屆選舉挑戰KK都屢戰屢敗，所以明年選舉決定換人，派出有雙學士學位、又係運動健將嘅小花Joephy陳穎欣出戰。

設計圖片及對白

副理事長千金出戰

工聯會喺一一年區議會派出小花劉桂容，喺天水圍擊敗立法會議員李卓人，成功「氹仔浸蛟龍」，自然食過翻尋味，明年選舉照辦煮碗，派出香港大學經濟金融學學士及英國倫敦大學法學學士Joephy落麗閣選區插旗挑「基」。

其實范國輝近兩屆同KK嘅票數相差不足一百票，據聞佢都唔多想走，但最終無奈被勸退。皆因原來Joephy爸爸係海關人員總會主席、工聯會副理事長陳志光，有父蔭祝福，范國輝想唔讓路都唔得喇。唔知係咪因為咁，聽聞工聯會對KK個區議會議席志在必得，但實情仍存隱憂。

有政壇中人話，有機會轉軚支持政改方案嘅泛民主派議員當中，傳聞KK係其中一人，如果佢真係轉軚，或會同有關方面講數，要求建制派唔好派人挑戰佢個區議會議席，如果有關方面首肯，Joephy就焗住要收韁返歸，白白浪費前期備戰工作，所以工聯會似乎最想KK堅持立場，反對政改方案咁話。

但工聯會中人就另有想法，話政府要向泛民撬四、五票，唔止要KK一票，所以撬票之說係風聲多過實際。又指KK身為政壇老將，無理由驚個細路女，係都擔心區選會被激進泛民狙擊，萬一泛民之間互相廝殺，建制派就會坐享漁人之利，到時佢連立法會超級議席「入場券」都無埋，還原基本步，選番九龍西。