政壇：田二少鬧爆教育唔得掂
外訪多過返工嘅教育局局長「吳得掂」吳克儉，竟然頻頻「『遊埠』也中槍」。立法會議員「田二少」田北辰尋日接受電台訪問時，提及咁多學生參與佔領行動，以違法同影響他人利益嘅手法，爭取憲法上冇可能達到嘅訴求，反映香港教育制度失敗，更予人感覺佔領學生有姿勢、冇實際、自私兼意氣用事添，句句都衝住吳得掂而來，擺明指桑罵槐。
設計圖片及對白
憂違法行為「正義化」
自佔領行動爆發以來，吳得掂幾乎全程潛水，未有就學生擔當運動主導出過聲，除咗個人能力以外，經常離港考察相信係原因之一。繼身兼新民黨立法會議員葉劉淑儀日前以書面質詢，「關注」吳得掂做遊埠局長頻頻外訪後，其黨友田二少昨亦主動向吳得掂開火，指參與佔領嘅學生有理性、激情，但對佢哋嘅爭取手法好失望，又話佔領行動反映回歸後，政府對於「一國兩制」嘅教育工作徹底失敗，建議政府要讓學生趁中學時期多了解《基本法》，好似討論提名委員會組成等。
田二少更擔心長此下去，有強烈反法治、反政府意識嘅新政治勢力形成，將違法行為「正義化」，相反理性討論就被邊緣化。不過，講到了解《基本法》，經常會被誤解為向學生「洗腦」，田二少反指講法係「鴕鳥政策」喎。
此外，田二少亦緊跟葉劉嘅「撐警」路線，再度讚揚警方喺佔領行動執法期間極為克制，形容警方係「有苦自己知」，有可能因為政治考慮而有法不能執。
佢又話從片段睇到有警員不斷被示威者辱罵家人挑釁，質疑示威者係專登捕捉警察失控嘅畫面，以引導全球輿論，話如果畀着佢受到呢啲侮辱，佢都會瘋狂喎。
