東方紅太陽升 風景這邊獨好

有麝自然香，讀者識欣賞。根據Oracle Added Value公司最新調查報告，《太陽報》讀者超過一百七十四萬人，連續十五年穩佔全港銷量第三位；《東方日報》讀者更超過三百九十一萬人，連續三十八年全港銷量冠軍。兩報合計，讀者超過五百六十五萬人，分別比舊年增加三萬七千多人及近十五萬人，即係總共多咗十八萬七千多人。如果扣除讀者重疊部分，兩報讀者佔全港人口比例高達六成，係名副其實嘅香港人報紙，試問誰與爭鋒！

相反，有爛果報之稱嘅《蘋果日報》就相形見絀咯，讀者比舊年少咗近十六萬人，跌幅達百分之七，正一係王小二過年，一年不如一年。唔怕唔識貨，最怕貨比貨，東方及太陽兩報讀者加埋比爛果報多三百四十萬人，淨係東方讀者都多一百六十六萬人喇，唔到你唔服o架。

喺度順便話畀各位知，Oracle Added Value唔係泛泛之輩，而係市場調查公司嘅佼佼者，喺全球十四個國家設有分公司，江湖地位毋庸置疑，調查數據冇花冇假，絕對夠權威o架！

講完讀者人數，不妨再睇睇讀者質素同背景。調查顯示，東方及太陽讀者當中，約一成半在職人士係僱主、行政人員、經理或者專業人士，四成一在職家庭收入超過三萬元，約四分一讀者擁有大學或以上學歷。仲有吖，東方讀者入面，超過二百二十萬人係家庭主要消費決策人，比爛果報多六成半。即係話，好多家庭嘅重大消費決定都係由東方讀者拍板，如果你係廣告客戶，應該識得選擇喇。

冇錯嘞，廣告效益主要睇讀者人數及質素，透過東方及太陽兩報推廣產品，必然事半功倍。事實勝於雄辯，今年四至十一月，東方及太陽兩報廣告量總共達二十六萬五千幾條，爛果報只得十萬條多啲咋，根本冇得比。所以話，廣告客戶眼睛係雪亮嘅。　

仲有吖，東方報業集團旗艦網站《on.cc東網》表現同樣不俗，調查指百分之十六受訪者曾經瀏覽東網，平均瀏覽次數為每星期八次；東網讀者平均年齡為三十八歲，近四成為大學程度或以上。係人都知，依家係網絡時代，無遠弗屆，如果客戶同時喺兩報及東網落廣告，一定可以相得益彰，如虎添翼。

一句講晒，風景這邊獨好。《東方日報》及《太陽報》力求創新，精益求精，絕對係廣告客戶嘅最佳選擇。計太一叮話齋，行得快，好世界，大家千祈唔好執輸吖！