發展局月初宣布接納古諮會建議，將港鐵沙中線土瓜灣站車站大堂中間嘅宋元古井先拆除再重置，工聯會立法會議員陳婉嫻（嫻姐）卻做攔路虎，尋日佢同傳媒茶敍時，透露近日聯同兩位關注沙中線發現文物嘅教授，一齊去信要求國務院文化部派專家來港考察，佢哋又以專家身份向港府提供保護文物嘅意見。嫻姐都知自己可能過界，咁做可能會破壞一國兩制，甚至中央未必會因為一個古井而叫港府停止興建沙中線，但港府勸極都唔聽，佢話自己惟有出此下策喎。咁算唔算搵中央嚟「教訓」陳茂波呢？

設計圖片及對白

佢批評，港鐵選擇用最平嘅方式保育文化遺產，而發展局又盲目聽從港鐵意見，不惜破壞具歷史意義嘅古井，認為唔係所有嘢都可以用金錢嚟衡量。仲話，由於成件事會直接影響港人身份認同，所以先希望中央同政府正視事件。

不過，對於土瓜灣居民嚟講，一直對興建鐵路望穿秋水，如果沙中線延遲落成，相信對居民有一定影響，況且鐵路有助樓價提升，總希望愈快通車就愈好。想當年嫻姐成功加入議會都係得到區內居民支持，但係依家佢寧願攬住個沙中線古井，都要同居民對着幹，區內居民點諗呢？

第一手消息請下載on.cc東網iPhone/iPad/Android/Windows Phone Apps