阿里巴巴喺美國上市後,一舉一動零舍受人注意。黑客入侵索尼(Sony)電影公司嘅最新爆料話,阿里巴巴想投資翻拍八十年代經典電影《捉鬼敢死隊》,嘩,唔通馬雲想做埋電影大亨?

據最新披露嘅網上資料,馬雲被踢爆曾拜會荷里活猛人。(資料圖片)

話說今年十月,阿里一眾高層喺影星李連杰帶路下,去拜會荷里活電影人,索尼電影係馬雲唯一一間親身上門嘅電影公司。根據黑客公開出嚟嘅索尼電郵顯示,除咗《捉鬼敢死隊》之外,阿里亦都有興趣投資明年上映嘅3D動畫Pixels,以及希望能夠開拍《蜘蛛俠》入面奸角Sinister Six、網遊《龍族》、日本漫畫《海賊王》相關嘅電影。

根據一啲消息人士爆料,阿里希望以「部頭制」投資,即係只會投資有興趣嘅電影,而唔會投資落電影公司之內。

而阿里去荷里活,亦都係希望可以傾成一啲電影、電視嘅版權,以協助阿里喺中國四百億元人民幣嘅網絡視訊市場分一杯羹。

第一手消息請下載on.cc東網iPhone/iPad/Android/Windows Phone Apps