雖然立法會仲未通過創新及科技局撥款申請,但自從勞工及福利局副局長蕭偉強加入政府後,三司十二局問責班子基本上已經齊人,所以特首辦邀請問責局長、副局長及政治助理共四十幾人,原本打算尋日朝早八點鐘,大家齊集添馬公園影番張大合照。不過,天公不作美,由朝早六點幾鐘就一直落毛毛雨,特首辦就喺朝早七點鐘通知取消活動,另覓日子再影過。

由於問責班子平日工作繁忙,加上不時又要飛去其他地方公幹,根本好少機會會集齊人喺香港。

所以經過多次夾日子後,特首辦日前終於敲定喺尋日影大合照,又提醒各司局級官員要着得靚啲,話到時會影兩輯相,一輯係正正經經咁企喺度,另一輯就會影得比較隨意,大家可以隨便擺甫士咁話,但依家就要暫時收番啲靚衫先嘞。

第一手消息請下載on.cc東網iPhone/iPad/Android/Windows Phone Apps