立法會尋日召開聖誕假期前最後一日大會,但仍然未能完成所有議程,要留待下月繼續討論。當仲有半小時先至完會時,主席曾鈺成突然宣布提早休會,之後仲同一眾秘書處人員急急腳行去附近一間酒樓。莫非曾鈺成突然覺得肚餓,所以要提早散會走去醫肚?

立法會尋日提早半小時休會,莫非為咗秘書處開聖誕派對?(受訪者提供)

秘書長陳維安(Kenneth)透露,其實秘書處尋日舉行聖誕派對,喺附近酒樓訂咗四十圍,同大約四百八十位秘書處同事慶祝聖誕節。曾鈺成致詞時多謝秘書處今年辛勤工作,又話今年唔算太辛苦,因為明年會更加多嘢做喎。

派對除咗玩遊戲外,秘書處仲搞咗個抽獎環節,禮物就由秘書處首長級部門主任及一眾議員慷慨捐出,當中Kenneth就捐出一隻可以量度心跳同血壓嘅健康手鈪,而會計界議員梁繼昌及資訊科技界議員莫乃光就夾份送出一部平板電腦抽獎,務求人人都可以盡興而返,過一個開心聖誕節。

第一手消息請下載on.cc東網iPhone/iPad/Android/Windows Phone Apps