政壇：名人齊推崇廣西靚藥材
香港廣西社團總會旗下香港廣西總商會（商會）日前舉行成立四周年暨十四市商會成立典禮，一班熟悉廣西嘅總會及分會成員聚首一堂。咁啱得咁蹺，總會會長鄧清河及副會長陳宇齡（Abraham）都係經營藥材生意，佢哋異口同聲大讚廣西出產嘅藥材質量特別好。
陳宇齡（右）與姐姐陳依齡兒子Jeremy一同出席活動。
李君豪趁日本抵玩，與家人一齊去名古屋自駕遊。
鄧清河話，廣西嘅地勢多數都係高低不平，有利於唔同品種嘅植物生長，而且地理位置偏南，南藥特別多。佢又話，香港人生活節奏急速，應酬飲酒多，好傷肝，廣西嘅雞骨草就啱晒香港人飲喇，間中一日煲嚟當水飲，對肝臟相當有益處喎。生產靈芝等中草藥健康產品嘅Abraham就話，中藥唔一定要貴價先算係好，好似廣西盛產嘅羅漢果同肉桂，雖然價錢便宜但功效唔錯。
當晚出席嘅仲有紀惠集團副主席廖偉麟（Jeffrey）、香港廣西青年聯會主席鍾易民及常務副會長兼港交所獨立非執行董事李君豪（Vincent）。講起日圓大跌，Vincent話會同家人一齊去名古屋自駕遊，過番個溫馨聖誕假期。雖然Jeffrey係廣東人，但佢話廣東廣西都係隔籬鄰舍，加上其家族在廣西營辦十間幼稚園，所以同當地好密切。
