教育局局長吳克儉(吳得掂)成日外訪,不但引起市民關注,連身兼行政會議成員嘅新民黨主席葉劉淑儀都表關注,睇番佢兩年半任期中,外訪次數超過二十次,使費更多於三百六十萬元,真係成個遊埠局長咁款。對於頻頻外訪、離岸,吳得掂解畫指,佢係倣效其他國家官員陪同學生一齊出席大型比賽以示支持,跟住又話,帶學生外訪係為擴闊同學嘅國際觀。乜外訪唔係睇重要性及必須性嘅咩?何況要官員陪同,係咪一定要一局之首呢?咁要培養學生有世界觀,係咪要帶學生團環遊世界呢?吳得掂真係愈解愈衰,難以令人信服。

設計圖片及對白

話有新政策就要考察

吳得掂死撐外訪有理,佢話,一個國際城市嘅教育改革好重要,又話新高中學制的資歷需要得到國際的認可和合作,所以佢要親身前往好多唔同嘅城市交涉,外訪係為咗令同學未來發展暢通無阻喎。佢仲話,有新政策推行時,例如草擬幼稚園教育及資訊科技教育政策時,都需要參考唔同國家或城市嘅經驗,所以佢就去咗南韓、新加坡及澳洲等考察。不過,有議員就質疑呢啲國家係咪真係好過香港及具參考價值。

至於帶學生一齊去印尼,佢就解釋係為咗擴闊同學嘅國際觀,話印尼係東盟內的「大阿哥」,同學親身前往先可以見到當地嘅經濟機遇及實際情況喎!佢仲話,收到有教師及同學反映,指好多其他國家都會有官員陪同學生一齊出席大型比賽,相反香港好少官員隨團,所以佢先至陪學生一齊去,支持吓佢哋喎。

不滿吳得掂成日外訪及放大假嘅人中,有傳包括同佢唔咬弦嘅教育局常秘謝凌潔貞。嚟緊嘅一月,謝凌潔貞將同食物及衞生局常秘黎陳芷娟調職,講到換常秘,吳得掂重申唔回應,話公務員調動有既定機制,佢都係跟住機制辦事。

第一手消息請下載on.cc東網iPhone/iPad/Android/Windows Phone Apps