平機會入不敷支 周一鑊冇好帶挈

嗱，冇花冇假o架，最新年報顯示，自從周一鑊去年四月出任主席後，平機會就好似黃河決堤亂咁使錢。條數係咁嘅，截至今年三月，平機會錄得九千七百多萬元收入，但支出竟然超過一億，虧損近四百萬元。啲錢大部分用於職員薪酬開支，高達五千七百幾萬元，比上年度大增一成六；未用年假嘅準備開支亦高達五十七萬元，較上年度飆升超過一倍。咁仲唔止，職員外訪開支亦大增兩成一達六十六萬多元，問你服未。

由儉入奢易，由奢入儉難。咪以為使凸咗幾百萬好小兒科，使慣咗姿勢咯喎，要收手就難嘞。再講吖，公帑要應使則使，點可以洗腳唔抹腳o架。話時話，周一嶽成廿萬月薪，納稅人早就睇到眼冤喇，家陣平機會薪酬開支仲不斷上升，完全物非所值。試諗吓，平機會呢一年除咗添煩添亂，仲有乜貢獻吖？淨係提出為「族內歧視」立法，同埋將異性及同性關係「事實婚姻」納入保障範圍，已經夠晒無風起浪，惹起社會極大爭議，慌死香港唔夠亂咩。

仲有吖，該會喺一三至一四年度接到嘅投訴個案，比上年度大幅減少一百宗至八百二十七宗，反映市民幾咁唔信任周一鑊。嗱，照計工作量大減，效率應該提升至啱，事實恰好相反咋。平機會嘅工作達標率不升反跌，六個月內完成處理投訴個案嘅達標率，由原來八成二下滑至只有七成八；而三個月內審批法律協助申請並回覆申請者嘅達標率，更由八成八下跌至七成九。所以話，平機會錢就識得使，嘢就懶得做，有冇再離譜啲吖。

講開又講，平機會臭罌出臭草，濫用公帑已經唔係新聞，歷任主席幾乎冇個似樣嘅，最經典係前主席鄧爾邦遊埠多過返工而被審計署狠批「不稱職」，個朵臭晒啦，點知周一鑊呢塊廢電池仲衰多兩錢重。淨係睇平機會嘅職員外訪開支突然大增，就知周一鑊同佢前老闆貪曾一樣咁鍾意「周遊列國」，最叻假公濟私。

一日最衰都係港府，明知周一嶽係瘟神，到邊度害邊度，係都要翻閹佢出掌平機會，結果咪添煩添亂，唔衰攞嚟衰囉，叮！