城中鏡：馬雲身家漲1.73倍 增幅壓巴菲特蓋茨
二○一四年話咁快就完，大家又係時候總結吓今年嘅財富係漲咗定縮咗。而喺一眾全球財金界億萬富豪入面，阿里巴巴主席馬雲今年身家暴漲，增長金額同幅度均力壓股神巴菲特同埋微軟蓋茨。而相反，輸家係俄羅斯一位能源大亨，油價大跌，搞到佢今年身家勁縮70億（美元．下同）。
馬雲
一間為超高淨值客戶及機構提供資訊服務嘅公司—Wealth-X，統計咗今年財金界富豪身家增長嘅贏家同輸家。其中，受惠阿里巴巴集團今年上市兼公司股價上升，馬雲順理成章成為富豪榜大贏家，今月資產淨值達到292億元，比上年十二月增加咗185億，或1.73倍。無論增長金額或增幅，同樣係冠絕其他富豪，相當犀利。
至於屈居第二嘅，就係大家唔會陌生嘅股神巴菲特。今年股神身家較去年同期增長咗135億元，或23%。至於身家增長排第三及第四嘅，分別係微軟創辦人蓋茨，以及facebook嘅創辦人兼行政總裁朱克伯格。
不過，有贏家自然都有輸家。國際油價呢排係咁跌，俄羅斯能源大亨、天然氣公司Novatek（諾瓦泰克）主席兼行政總裁Leonid Mikhelson身家亦由上年嘅170億元，暴跌至今月齊頭100億元，身家短短一年蒸發咗逾四成，都咪話唔傷。
