城中鏡：張路路柬國授藝助婦孺「編織」人生
香港各界都有唔少嘅有心人，好似本地時裝設計師張路路咁，就同其他本地設計師朋友合作舉辦慈善義賣活動，為柬埔寨嘅婦孺進行籌款，佢尋日就現身慈善義賣活動，話柬埔寨好多婦女都係遭到人口販賣嘅受害者，本地一班設計師早前就去咗當地一個星期探訪佢哋，同埋親手教佢哋一啲手工藝，例如手織手袋，繡花同埋車衫，等佢哋有一技傍身，可以自力更生，而今次義賣嘅手織手袋都係當地婦孺織嘅。
張路路（右）同都係設計師嘅朋友Ivy，一齊參與義賣活動。
張路路又話：「我教繡花繡咗幾個鐘，不過我一啲都唔覺得辛苦，反而覺得好陶醉，好享受。呢個係我最難忘既旅程，可以幫到人真係好有意義。最後嗰晚我哋仲舉行咗個福音播道會，我哋橫風橫雨走過啲泥地，喺啲黑漆漆街度去搵人參加，好想傳遞正面嘅訊息同能量畀佢哋。我哋出年都會再去探訪。」
