城中鏡：雙甄聚工展 文達顯刀功
依家開始咗嘅工展會，又係一眾廠商年尾發力追數嘅時候，唔少攤位都各出奇謀，務求趁聖誕及新年假期前後，補追番早排因佔領行動受影響嘅營業額。尋日就喺工展會會場內見到名廚甄文達，喺甄沾記攤位大展刀功，雖然甄文達及甄沾記第三代傳人甄賢賢都係姓甄，但原來二人並非親戚，本身亦互不相識，只因機緣巧合於美國三藩市相遇相識。
甄文達喺工展會大展刀功。
甄賢賢（右）同家姐甄麗賢現身甄沾記攤位撐場。
李豐年（左）同戴澤良都一齊嚟撐工展會。
甄文達話細個喺廣州嘅舊居附近有間甄沾記，經常聞到大大陣椰子香，令佢留下深刻印象。不過九十年代末，甄沾記跟隨當時潮流北上設廠失敗，於○六年時更被迫停業數年。
甄賢賢其後移居三藩市，巧合地甄文達亦喺當地，二人做咗街坊，並成為朋友。呢日甄文達為咗到場幫甄賢賢打氣，專誠一早拍完節目，由越南趕來香港，仲帶埋自家設計靚刀，表演切嘢嘅功架，不過完咗活動翌日，佢又會即刻離開香港，認真唔話得。
李豐年曾勸甄賢賢復出
講起好多人鍾意冬天食野味進補，甄文達自言甚少咁做，強調只要有均衡飲食嘅習慣，食乜都係點到即止，就唔使刻意進補。佢仲話現時好多動物棲息地被人類入侵，環境受污染，有病毒入侵咗啲動物都未必知，所以食野味有一定風險。
其後巧遇廠商會常董戴澤良同「糧油大王」李廣林之子李豐年，原來李豐年亦同甄賢賢相識多年，仲曾於甄沾記停業時，勸甄賢賢重出江湖振家業，皆因佢哋嘅椰子糖係好多人嘅童年回憶。
