政壇：搞搞政：樹根舌戰泛民互數臭
話說上周四金鐘清場時，十多名泛民議員喺金鐘佔領區「博拉」，包括立法會工務小組主席「袋巾傑」梁家傑在內嘅十三位身兼成員嘅泛民最終被捕，翌日先陸續離開警署，袋巾傑上周五凌晨經立會秘書處諮詢議員意見後，決定取消當日朝早嘅會議，身為上年度工務小組主席嘅工程界議員盧偉國質疑，雖然當日有二十六位議員反對開會，仍有十三位議員表示會出席，有足夠會議法定人數，加上即使正、副主席未能主持會議，委員都可互選人選主持會議，唔明袋巾傑點解唔跟議事程序做嘢。
設計圖片
跟住鍾樹根加入戰團，狠批袋巾傑濫用職權、「驕橫跋扈」，反問如果十幾個泛民議員被拘捕就唔開會，一旦有十幾個泛民議員集體自殺，個地球係咪就唔轉咁話。樹根又揶揄泛民並非日日都公民抗命，只係清場時先至等上鏡「博拉」，認為明明當日被釋放後，有足夠時間返立會開會，都寧願返屋企瞓覺，根本就係為咗自己私利喎。
嗌交花了一半會議時間
面對建制派嘅炮轟，新民主同盟議員范國威反擊，指建制派係「乘人之危、雙重標準、惱羞成怒」，又將矛頭對準樹根，諷刺對方過往同袋巾傑駁火時，成日開口夾着脷，尋日終於正確咁講得出四字詞語咁話。另一泛民議員陳偉業亦寸爆樹根，形容對方係使用四字詞嘅「權威」，冇人勁得過佢。
結果班議員就為此，花咗一半會議時間去嗌交，一項撥款申請都未通過，認真得個吉。
