佔領行動甫落幕,「搞事四人幫」成員之一、「民主阿婆」前政務司司長陳方安生再次「攪局」,前日同傳媒茶敍時,突然提到喺全國人大常委會現有嘅政改框架下,雖然唔可以爭取到最理想方案,仍認為當中仲有談判空間,隨即惹來人民力量「大舊」陳偉業強烈反彈,不點名強烈譴責民主阿婆毫無良心,且出賣群眾利益。

大舊尋日回應記者提問時,雖然全程無直接提到民主阿婆個名,但言談間多次以「she」形容對方,意有所指,連番暗批民主阿婆。

大舊首先批評,有自稱民主派嘅人士認為喺現有政改框架下仍然有商討空間,批評有關言論係出賣學生同佔領行動,又話佔領人士連日堅持喺街頭留守,都係希望爭取真普選,有人渾水摸魚,自稱係民主派人士,但佢嘅言論已經出賣咗自己,呼籲民主派同參與佔領行動人士,要認清自稱民主派嘅人,又覺得要對出賣群眾利益嘅人予以譴責。

第一手消息請下載on.cc東網iPhone/iPad/Android/Windows Phone Apps