政壇：梁君彥去廁所要人打救
本港氣溫急降，稍一不慎就好易病倒。立法會主席曾鈺成尋日亦感冒發作，朝早主持立法會大會十幾分鐘後，因身體不適，需要返回主席房休息，由內務委員會主席Andrew梁君彥代為主持會議，適逢內會副主席湯家驊離港外遊，Andrew喺冇替身嘅情況下，做咗成日代主席，下午更要由黨友Jeffrey林健鋒響鐘數法定人數，為佢製造食飯同去廁所嘅時間。
林健鋒要求點法定人數，梁君彥（圖）先有機會去廁所。
立法會秘書長陳維安話曾鈺成感到唔舒服，要休息一下，但冇具體透露曾鈺成嘅身體情況，亦唔清楚佢可唔可以處理餘下嘅議程。於是Andrew喺無人頂替嘅情況下，做咗成日代主席，連食飯、去廁所嘅時間都冇，只可以趁人民力量同社民連拉布、要求點法定人數時，先至有時間去廁所。
到下午四點，Jeffrey亦要求點算法定人數，Andrew似乎隨即會意到佢嘅用意，喺對方提出點人時，迅速離開主席位。喺響鐘十幾分鐘後，議事廳內終於齊人，一班議員認真有默契。
