政府建議立法規定男士可享有三日有薪侍產假，尋日正式到立法會「闖關」，勞工及福利局副局長Stephen蕭偉強首次以副局長身份到立法會，幫手推銷男士有三日法定侍產假，盼上任後首個草案可以「順產」。佢自言唔使申報利益，因為細仔今年已經二十五歲，最希望快啲抱孫，留番畀細仔享用侍產假。

蕭偉強

Stephen其後自爆，太太曾經發夢見到自己懷有第三胎，夫婦二人都形容呢個為噩夢，笑言要做好家庭計劃。不過，當問及係咪想有祖父母侍產假時，Stephen就笑笑口話「都好喎」。

講到同議員過去打交道經驗，Stephen話加入問責團隊前做過康復專員，當時已同立會關心福利課題嘅議員聯繫交流，今次亦努力爭取勞工界支持。佢再三強調，拉票係團隊工作，即使男士三日侍產假順利通過，都係大家嘅功勞，唔敢功高蓋主咁話。

第一手消息請下載on.cc東網iPhone/iPad/Android/Windows Phone Apps