政壇：高佬賢列入立會懶蟲榜
話說立法會議員天主教監察組每年都會對議員進行監察並發表報告，尋日佢哋就公布上個立法年度議員表現，新界鄉議局主席劉皇發同醫學界議員「怪醫」梁家騮非首次於「懶蟲」行列榜上有名，所以今次再度上榜唔算係新鮮事，之但係監察組竟然點名話漁農界議員「高佬賢」何俊賢成為「懶蟲」新貴，就真係出乎意料，唔通佢真係表現咁差？
設計圖片及對白
睇番監察組數據，發叔除咗就將部分不包括土地納入郊野公園嘅法案提出修正案，二十三年嚟都冇提過動議或修正案、八成時間出席會議但唔投票、發言三次、質詢四次，被記四個缺點。至於怪醫就缺席二十四次大會、六成五時間唔投票、六次發言。高佬賢就冇提出動議、發言七次、質詢四次，兩人都被記三個缺點，監察組對佢哋予以譴責。
怪醫同高佬賢異口同聲質疑調查準確性同偏頗，其中怪醫話自己喺中環診所睇大會直播，應該交畀選民判斷自己係咪「懶蟲」；高佬賢就話唔應該計較提出幾多質詢，而係睇對業界貢獻，佢下月就會提出動議討論農業發展，不過都會接受社會批評。
當問及泛民五名議員收取壹傳媒肥佬黎政治捐款，監察組就疑「小罵大幫忙」，佢哋認為公文袋黨魁梁家傑唔應該用個人戶口處理政治工作，有改善空間；公文袋毛孟靜同白鴿黨涂謹申雖然否認收錢，但指控喺立法會選舉期間，或涉及賄選，佢哋同廉政公署應該進一步澄清。
稱廉署查阿人「匪夷所思」
至於承認收錢嘅工黨「阿人」李卓人同社民連梁國雄輕率處理捐款，監察組形容「實屬不智」，其中阿人仲擺咗筆錢喺自己戶口九個月，因此對兩人予以「批評」，不過監察組同時留有尾巴話，阿人被廉署調查係「匪夷所思」。監察組對「懶蟲」又記缺點且連聲譴責，對於泛民議員嘅批評就疑似就住就住，話佢哋係以同一把尺去發炮，講都無人信嘞！
