基建延誤要趕工 浪費公帑更奪命

話口未完又嚟嘞，一名五十八歲挖土機司機日前喺港珠澳大橋人工島地盤開工時，懷疑風高浪急令躉船搖晃，失去平衡連人帶車跌入廿幾米深海底，被困十七小時後被救起，可惜已經返魂乏術。

呢宗工業意外原因係點，有待當局調查，但太一叮敢寫包單，九成九同基建工程延誤有關。即係咁，工程滯後咯喎，自必然要趕進度，趕進度咯喎，自然要加班加點，機器長時間超負荷都會冧偈啦，更何況係血肉之軀？就講港珠澳大橋工程吖，為咗趕二○一六年死線，路政署惟有「加班、加人、加機器」。今次事故裏面嗰位工友，原本傍晚六點收工，直踩到深夜十點幾都冇得抖，結果咪出事囉。嗱，講出嚟嚇親大家，一一年至今，大橋工程已造成最少六死四十八傷，其中四宗更加喺今年下半年發生，你話係咪收買人命吖。

所以話啫，呢單嘢表面係意外，實際上可以話係謀殺。大家應該仲記得，大橋○九年動工後冇耐，有反對派政黨鼓動市民就工程嘅環評提出司法覆核，就係因為咁而唔見咗近一年時間，造價飆升六十幾億元唔在講，趕頭趕命更搞到奪命意外接二連三。政棍不殺伯仁，伯仁因政棍而死，真係一啲都冇講錯。

講真，要趕進度嘅基建工程點止港珠澳大橋吖。呢，蓮塘/香園圍口岸大樓工程最近又爆超支問題，仲係三級跳咁誇張添，發展局高官尋日主動爆響口，話有項目標書將喺月底到期，如果到時仲未獲立法會通過撥款，好可能要重新招標喎。唔使問阿貴，工程又要繼續超支啦。

唔講撥款猶自可，一講把幾火。家陣反對派大玩不合作運動，拖施政後腿無所不用其極，莫講話基建撥款，連關乎基層民生嘅低收入在職家庭津貼，佢哋都夠膽死做攔路狗，簡直係與民為敵。不過咁，港府自己都唔好得幾多嘅咋，大家有眼見，港府對基建工程無監無管，放任自流，高鐵延誤超支，港府事前如在夢中，事後更加幫手隱瞞，咪就係最典型例子囉。

始終都係嗰句，政府無能，政客無良，基建工程蝸行牛步，公帑焗住掟落海，工人焗住搵命博，香港真係多得佢哋唔少吖，叮！