名媛郭秀雲以青少年動物拯救大使身份出席一個寵物嘉年華活動，又透露香港愛護動物協會教會青年人愛心，又話：「畀個機會佢哋實習，照顧下小動物。」佢又話自己近日喺會展擺設攤位，宣傳其保育基金，拯救瀕臨絕種動物：「我聖誕都會留喺香港，因為做保育需要好多時間。老公唔會投訴我，因為佢知我對呢件事好認真。」至於囝囝錢景峰今年已大學畢業，正喺洛杉磯嘅銀行工作，問囝囝係咪有意喺幕前演出時，佢話囝囝係想做幕前，但係未必喺香港做。咁囝囝有冇拍拖？佢話：「有約會對象囉！佢每次拍拖都會介紹女朋友畀我識。」

由多個團體合辦嘅寵物嘉年華，宣傳愛護動物嘅訊息。

郭秀雲（左）同傅明憲身體力行支持愛護同拯救瀕臨絕種嘅動物。

同場仲見到愛護動物協會會長傅明憲帶同愛犬獅子頭現身，佢話：「依家只係養咗兩隻狗，因為覺得自己體力無以前咁好，照顧唔到咁多狗。」佢透露最近忙於協會嘅活動，因為狗容易中暑，所以趁冬天搞狗狗活動。至於聖誕會舉行狗派對，佢話：「我到時會自己煮嘢，古巨基教咗我煮番茄飯，到時會煮畀大家試。」

第一手消息請下載on.cc東網iPhone/iPad/Android/Windows Phone Apps