城中鏡：魔髮師拉隊義剪 在囚青年樹形象
亞洲髮型大師Kim Robinson尋日將髮廊關門一日，拉隊做義工，聯同六名歌連臣角懲教所在囚青年，到訪國際婦女會長者鄰舍中心，為九十名長者義剪；當睇見在囚青年落足心機學嘢，埋頭苦幹剪髮，Kim不禁流下男兒淚，鼓勵犯過錯嘅青年唔好放棄，只要肯改過自新，學習一技傍身，將來成就叻過佢都唔定。
Kim Robinson用十五分鐘為吳女士剪出新形象。
彭徐美雲（左）同鄧慕蓮又派福袋又唱歌，同長者提早過開心聖誕。
單日堅（左）返埋平安夜就退休，之後陪太太Carmen環遊世界。
懲教署同國際婦女會合辦嘅「飛短留長」義剪活動，今年係第二年舉行，聽見Kim到訪，中心一位七十歲長者吳女士，第一個舉手做模特兒。Kim亦爽快答應露兩手，見佢揮動「魔剪」，十五分鐘就搞掂。吳女士望見鏡中新形象，哈哈大笑話「我睇落似四十歲」。Kim其後用自身經歷勉勵青年，自言年幼時家境清貧，如果唔係學會剪髮，躍身世界舞台，如今仍係「鄉下佬」一名。
鄧慕蓮贈長者福袋
國際婦女會主席彭徐美雲話，搞義剪日旨在讓長者剪個靚髮過聖誕，又話︰「唔少長者為慳錢，一年都未剪過頭髮，今次有人幫佢哋扮靚，長者們開心咗好多晚。」僑界社團聯會名譽會長鄧慕蓮則話，佢幫襯Kim剪髮三年，得知Kim有意服務長者，拍心口贊助活動之餘，仲送出逾百個福袋，同班長者提早過開心聖誕。
另一合辦單位代表、懲教署署長單日堅都有帶埋太太Carmen黃嘉敏撐場，據知單Sir返埋平安夜就退休，Carmen笑言今個平安夜，應該係最平安的一年喎。
