政壇：白鴿黨換屆無新意
喺佔領運動一役中，令到學界代表彈出，對於泛民主派明年區議會、一六年立法會選舉嘅影響仍有待觀察，可以肯定嘅係唔少青年人有意喺政黨政團擔當更重要角色，之不過白鴿黨同主要由早年退出白鴿黨成員組成嘅新民主同盟，尋日舉行領導層換屆選舉都冇乜換藥，幾乎大部分都係熟口熟面嘅面孔，莫非佢哋認為青年人求變嘅呼聲唔夠強烈？
設計圖片及對白
白鴿黨尋日進行兩年一度嘅換屆選舉，選出正副主席、中委等職位，其中主席位置係「四揀一」，分別係角逐連任主席嘅劉慧卿、立法會議員胡志偉、司庫吳永輝同埋上屆「挑機」失敗後，再接再厲嘅南區區議員區諾軒。
新同盟換骨幹僅3新人
尋日合共有三百一十六張選票，由於四名候選人中無人喺首輪取得過半數嘅一百五十九票，首輪最高得票嘅二人，分別係獲得一百五十八票嘅卿姐同一百零四票嘅志偉，再進行第二輪投票一決高下，最終卿姐以一百七十一票，以二十六票之差擊敗獲得一百四十五票嘅志偉。
至於兩名副主席，南區區議員羅健熙成功連任，葵青區議員尹兆堅亦以大比數擊敗吳永輝當選黨嘅新任副主席。中委方面，據知唔少卿姐支持者都高票當選，其中前西貢區議員柯耀林得到二百五十票，以最高票當選，中西區區議員許智峯排名第二，拎到二百二十票，至於棄選黨副主席嘅蔡耀昌，則以二百票當選中委。
白鴿黨大格局冇改變，新當選黨副主席、葵青區議員尹兆堅都承認，白鴿黨喺佔領運動出人力物力，但畀人感覺冇乜參與，承認同年輕人連接唔上。既然知道問題所在，似乎要諗吓有無新橋至得嘞！
新同盟亦都一樣，十二名召集人、執委等職位中，大部分都係舊人，包括立法會議員范國威，只有古俊軒、陳兆陽同陳惠達係新人，唔通泛民政黨都係走唔出舊人當道呢個宿命？
