奸商魚目混珠 官僚助紂為虐

係咁嘅，近排日式放題大行其道，連難得嘅「劍魚腩」都有得任食，幾大唔蝕底喇。結果應咗老祖宗嗰句，便宜冇好貨。有市民日前去餐廳食日式放題，「劍魚腩」冇少食，食完嚴重腹瀉，屙油不特止，「連放屁都會噴油」，搞到一褲都係，懷疑係食咗冒充劍魚嘅油魚，先至中招。

本港七年前曾經有超市以油魚充鱈魚賣，導致大批市民排油腹瀉，食安中心當時接獲七百幾宗投訴。事主今次懷疑有人魚目混珠，絕對唔係冇理由，為咗搞清楚真相，佢特登再去呢家日式放題幫襯，並攞走幾件刺身，經本報轉交日本料理師傅分析，師傅肯定啲問題刺身絕對唔係劍魚。有業界人士話，油魚屬廉價魚，價錢只係劍魚嘅一成半，唔排除有人魚目混珠牟取暴利。

正所謂，殺頭買賣有人做，蝕本生意冇人做，兩種魚差價咁大，無良奸商唯利是圖，鋌而走險唔出奇。問題係，如果監管到位，疑似「油魚」又點會出現吖？嗱，油魚喺日本早就被列為「有毒魚」禁售；喺部分國家只能作工業用途，而港府居然冇吸取以往嘅教訓，一直未立例規管油魚，直情助紂為虐喇。

最離譜嘅係，依家又有市民中招，當局居然唔當一回事。記者將有關樣本交畀食環署要求化驗，署方不但拒收，仲將個波踢畀海關；海關話就話會跟進，但兩周過去嘞，都未見有任何結果。官僚你推我讓，互扯貓尾，萬一涉事嘅真係油魚，有大批市民受害，呢隻鑊係咪你班官僚孭先？

話時話，本港問題食品層出不窮，無論係蘇丹紅蛋、過期肉，定係早排搞到兩岸三地雞毛鴨血嘅坑渠油，當局反應都係慢三拍。除咗監管甩漏，對奸商嘅懲罰威懾不足，亦有好大關係。好似內地咁，黑心食品氾濫成災，歸根究柢係犯罪成本太低，刑罰唔足以令違法者卻步，奸商咪愈來愈肆無忌憚囉。

有立法會議員呼籲當局把好關，禁止食肆隨意出售油魚，值得官老爺認真考慮。事關達官權貴都有機會光顧呢類日式餐廳，萬一領咗嘢，搞到一褲都係就狼狽嘞。叮！