設計圖片及對白
區議會選舉明年舉行，從政者跳槽、插旗行動不絕，因地區插旗多次爆發不和嘅民主黨（白鴿黨）同新民主同盟（新同盟），近排敵對關係有升溫之勢。事關新同盟獲幾名白鴿黨地區中人退黨轉投，有人更連退黨手續都未完成，就用新同盟嘅牌頭喺地區搞宣傳活動，激到白鴿黨紮紮跳，新同盟范國威呢次成功吸納新血，會唔會high到跳起呢？
悄悄加入新同盟嘅白鴿舊人係立法會議員單仲偕（單雞）一名姓湯嘅助理。聽聞呢位助理未完成退黨手續，就已經為新同盟做嘢，嬲到飛起嘅白鴿黨鬧爆新同盟用陰招搶人唔光彩，又批評退黨者係叛徒、反骨仔。單雞證實，該名助理已經口頭同佢講會退黨，不過由於佢未搞掂退黨手續，故事件會交由紀律委員會決定是否處分。
范國威就解釋，據知嗰位姓湯助理已經向白鴿黨提交退黨信，有權加入其他政黨。佢又否認新同盟搶白鴿黨人，辯稱既然有人去意已決，白鴿黨有乜理由要對人作出紀律處分。佢愈講愈嬲，話白鴿黨賊喊捉賊已經唔係第一日嘅事，好似將軍澳軍寶選區，明明民主動力已經將嗰區判咗畀佢哋，但白鴿黨竟然當唔算數，呢種行徑係既小氣又無黨格喎！四年前政改一役，白鴿黨臨時轉軚支持方案，范國威當時聯同二十幾位黨員齊齊退黨，另起爐灶成立新同盟，獨立之後范多次高調批評白鴿黨，搞到個黨有唔少人批評佢忘本、背信棄義，依家算唔算舊恨再添新仇呢？真係精彩陸續有來。
第一手消息請下載on.cc東網
