工展會尋日喺銅鑼灣維多利亞公園開鑼，唔少政界人士都去趁墟買嘢，譬如食物及衞生局局長高永文行咗個圈已經大有斬獲，包括幫襯社企買咗酸梅湯、葡萄醋及手作聖誕樹等，仲買咗泰式罐頭沙甸魚。佢話鍾意食沙甸魚而唔食吞拿魚罐頭，係因為沙甸魚繁殖力強，相反吞拿魚已經瀕臨絕種，所以唔忍心食。好多人怕食辣，不過高永文幾年前頻頻去四川賑災，由嗰時開始鍾意食辣，所以連買沙甸魚都首選香辣嘅泰式風味。

高永文（左）掃咗幾罐泰式沙甸魚，中華廠商聯合會常董史立德（右）陪同。

工展會係唔少人嘅童年回憶，立法會議員林健鋒（Jeffrey）都係常客。佢話當年雪糕批同椰子糖係必食之選，咁佢仲記唔記得一個雪糕批幾錢？自細衣食無憂嘅Jeffrey笑笑口話，細個買玩具同零食全部由父母畀錢，所以唔記得價錢喎！Jeffrey又好得戚咁話，佢仲保留粵劇名伶白雪仙同梁醒波昔日行工展會嘅珍藏相片，遲啲要拎出嚟畀大家睇吓咁話。

環境局局長黃錦星都有入場，有市民同佢講，見佢因「三堆一爐」撥款申請喺立法會被泛民議員「整蠱」（指拉布），好戥佢唔抵，但好開心依家三個堆填區嘅擴建撥款申請已過晒關，咁難得撞到知心友，黃錦星好識做，即刻請呢位市民飲啱啱買嚟嘅杧果汁！

第一手消息請下載on.cc東網iPhone/iPad/Android/Windows Phone Apps