政壇：林奮強嘆港無奮強

日前有個研討會討論「香港何去何從」，好多人都話香港已經迷失咗發展方向，尤其佔領行動發生後，更多人關心後佔領時期嘅路向，出席論壇嘅包括有林奮強、仍然身在官場嘅中央政策組顧問王卓祺及紀惠集團行政總裁湯文亮等。不時為香港「把脈」嘅前行政會議成員林奮強喺討論中言談相當悲觀，慨嘆香港冇把握一○至一四年呢「黃金五年」，佢話過去幾年，本港經濟大好，就業數據靚、綜援領取數字又大致維持不變，即使全球未來二、三十年冇運行，香港都能獨善其身。但香港社會卻出現排外風氣，更冇適時釋放土地，錯過咗發展機會。

原地踏步 人才流失

林奮強直言，好似過去幾年遊客增加，如果可以適時釋放土地，增加接待能力，就能令香港創造更大嘅輝煌，點知，港人既唔願填海，又唔肯碰郊野公園，一切原地踏步，搞到人才、機遇紛紛向外流，民間怨氣更大，所以咪係發奮圖強之心已死囉，佢呼籲港人「少啲口號，多啲實際」先唔會將機遇趕走。

王卓祺就唔係咁諗，佢話，呢個只係全球政治問題使然，至於佔領行動對比當年六七暴動，王認為唔算激，類似抗爭喺全球多國都經歷緊，只係港府官員唔習慣同輿論「鬥爭」，對外界反應比較慢啫。