少數族裔脫貧 首要學好中文

家陣多咗個升呢機會，幫本港少數族裔學生追求夢想嘞。教育局宣布，本學年起分階段為非華語學生開設應用學習中文科，最先推出嘅係「服務業中文」同「款待實務中文」，修讀期橫跨中四至中六。如果成績達標，八大院校同廿三間專上學院會接納課程為中文科基本登記要求，有關資歷亦獲得公務員事務局認可。

嗱，新措施或者真係有助少數族裔同學融入香港社會o架，雖然話姍姍來遲，太一叮都係嗰句，遲到好過冇到。之不過俗語都有話喇，為人為到底，家陣相關中文課程得兩個咁大把，而且只局限於特定行業，莫講話解決問題，怕且連止咳都未必做到。

正如關注團體負責人話齋，課程只局限於服務同款待業，就算同資歷架構掛鈎，都未必得到廣泛承認，長遠嚟講，當局應該為「中文作為第二語言」訂立清晰嘅課程目標，加強支援教師。

其實，少數族裔同學同其他香港學生一樣，都憧憬有朝一日成為社會精英。可惜夢想還夢想，現實歸現實，大多數人畢業之後，只能從事搬運、地盤同保安呢類人工較低嘅工作，因為中文程度低，限制咗升學同工作嘅選擇。

九七年之前，少數族裔唔使學中文，升讀大學或者做公務員都唔要求中文科合格。香港回歸後重視「兩文三語」，中文亦成為入大學同考公務員嘅必要資格。香港係中國嘅一部分，要求考生識中文無可厚非，弊在當局一直忽視少數族裔升學同就業需要，冇為佢哋制訂適合嘅中國語文教育課程，令矛盾愈來愈突出。

呢，之前有數字顯示，包括外籍家傭在內嘅少數族裔工作人口，主要職業收入中位數每月只得三千六百元。授人以魚，不如授人以漁，對少數族裔嚟講，經濟上幫助固然需要，但更重要係幫年輕一代掌握好中文，搵份好工。

港產官僚做嘢天一半地一半，新課程似敷衍少數族裔同學多過幫佢哋。試問教育局，如果香港連協助少數族裔融入社會都做到半桶水，仲有乜資格自認「國際都會」吖，叮！