政壇：搞搞政：約咗鬍鬚曾唔肯OT 建仔同泛民嘈大交

陳健波話拉布最嘥時間

呢場鬧劇源於建仔「譚Sir」譚耀宗，佢話下星期三晚四十幾位建制派議員有活動，所以八點後唔可以繼續開會。雖然佢冇講清楚係乜嘢活動，但心水清嘅人都知佢哋約咗財爺鬍鬚曾同財經事務及庫務局局長陳家強，就明年發表嘅財政預算案提供意見。譚Sir仲索性建議將夜晚八點休會常規化，等一班議員唔使開到咁夜喎。

社民連梁國雄隨即反駁話，如果建制派唔得閒就叫立會唔好開會，咁以後不如一個月先開一次大會，等大家都唔使咁辛苦。保險界陳健波就話開少兩個鐘對大會進度唔會有太大影響，反而泛民議員不斷拉布，又發起不合作運動，先係浪費大會時間。新民黨葉劉淑儀亦接力話，議員都應該要有標準工時，覺得開多兩個鐘唔人道。

公文袋郭家麒話睇唔過眼，話如果先例一開，日後只要有人開生日會或者娶新抱，就可以人多蝦人少，要求唔開會喇！人民力量陳志全亦話如果建制派真係要提早休會，佢到時惟有不停要求響鐘要求點算法定人數，等佢哋有氣無碇抖。眾議員就咁拗足半個鐘，個個講到嬲嬲哋，最後梁君彥決定將個波拋番畀曾鈺成，等佢決定究竟點做。