政壇:新末日博士露「約女」貼文
「新末日博士」魯比尼(Nouriel Roubini)又上位喇,不過今次唔係貼中乜嘢市況,而係因為佢喺Twitter將私人密訊當公開貼文咁發,結果將一段「邀約女伴」貼文公諸於世。
魯比尼(Nouriel Roubini)
魯比尼喺禮拜二晚發貼文,「親愛嘅Wenjie,尋晚見到你好開心。我依家去芝加哥出差,今晚得閒,有冇hotties可以一齊食飯飲嘢?」
有埋上款咁,擺明唔係想公開。佢好快就知自己賴咗嘢,於是刪除貼文,但又點夠一班網友手快呢?大家齊齊cap低佢嘅貼文,仲競猜究竟邊個係Wenjie。網絡上嘅起底組果然好可怕,大家好快就搵到Wenjie係一個芝加哥嘅衍生產品交易員。
呢位諾貝爾經濟學得獎者因為預言中二○○八年金融海嘯而聞名,憑住精闢獨到的分析都幫唔少投資者趨吉避凶,但係最近佢成日流出啲「被女圍」嘅相,大家就知佢其實風流成性。
其實照計「求女伴」佢都唔係第一次啦,咁嘅烏龍都擺得出,今次真係老貓燒鬚喇!