尋日會計師公會舉行周年大會，選出新一屆公會主席。舊年爆冷當選副主席嘅Ronald龔耀輝今年更上一層樓，挑戰公會主席寶座，可惜最後佢難以延續舊年嘅氣勢，飲恨輸畀另一位副主席何超平。其實Ronald多年來屢敗屢戰，永不放棄，呢種精神都幾抵讚嘅。

龔耀輝挑戰會計師公會主席之位，失敗而回。（資料圖片）

曾經係專欄作家，又曾以獨立身份參選過立法會嘅Ronald，一直喺會計界有唔少粉絲，今年佢諗住小試牛刀參選會計師公會主席。老實講，如果呢個位由全體會員選出，Ronald可能有機會跑出，可惜主席係由公會理事選出，就算Ronald有多多粉絲都無用。有消息話，現時會計界立法會議席已由屬泛民陣營嘅梁繼昌擔任，如果會計師公會主席都落入偏向泛民嘅人手中，咁會計界就會全面失守，所以唔少公會理事寧願揀何超平，都唔揀Ronald，唔知今次梁繼昌算唔算間接害咗人呢？

第一手消息請下載on.cc東網iPhone/iPad/Android/Windows Phone Apps