政壇：鄺祖盛接棒 幫助反吸煙
九龍樂善堂早前舉辦慈善晚宴，為「樂善關懷基金」籌款，董事局成員同城中名流齊去支持。見到樂善堂兩位前主席Antonio鄺祖盛同Lisa劉文文企埋一邊密斟，細問下，原來係講緊香港吸煙與健康委員會（下稱委員會）嘅工作。致力反吸煙十幾年嘅Lisa，三個月前卸任委員會主席，由Antonio接棒。Antonio賣口乖話Lisa做得咁好，令佢好大壓力喎。
劉文文（右起）、陳肇始同鄺祖盛（左）講起反吸煙，嘴形一致。
促禁報攤煙包燈箱
Lisa就笑笑口叫佢唔使驚，仲有大把嘢做。問Lisa任內有乜嘢最難忘，身旁嘅食物及衞生局副局長陳肇始即刻鬼馬搶答，話係連加三次煙稅喎。其實Lisa任內仲成功游說政府推出多項反吸煙政策，成功將吸煙人口比例降低至個位數，都叫做交出一份靚成績表，但佢就話仍有好多做嘢空間，例如將煙盒包裝上嘅圖像警示面積擴大，以收阻嚇性，仲有報攤等香煙銷售點仍以燈箱展示煙包，香港應該跟隨挪威等國明文禁止咁話。
講番個晚宴，樂善堂主席羅永順、晚宴籌委會主席李聖潑等人忙到滿場飛。常務總理兼「暗瘡剋星」Jackeline楊小玲都招呼朋友去支持。一向追求健康嘅Jackeline喺西貢大屋種好多瓜菜，成日有收成，早幾日仲意外長出幾條大番薯，放埋一邊等乾晒水後煲番薯糖水食，真係夠晒有機。
