政壇：趁清場蒲頭 鄭耀棠領功？
持續兩個幾月嘅佔領行動前日終極清場，相信無論泛民抑或建制派都鬆一口氣，始終日日為佔中大聲疾呼都攰，要趁呢幾日抖抖。不過，連日終極「潛水」嘅行政會議成員兼港區全國人大代表鄭耀棠就趁清場後，一連兩日大開金口點評佔領行動兼支持政府，唔通真係如我哋前日所講，怕被北京秋後算帳而趕搭尾班車領功？
設計圖片及對白
話撤銷政改「難人所難」
我哋前日講過，北京對建制派就佔領行動發聲，講明會「賞罰分明」，非要盡最大努力反佔中不可，否則定必秋後算帳。唔知係咪因為咁，鄭耀棠作為極資深港區全國人大一員，趁清場後大讚警隊表現專業、忍耐，批評部分人口講爭取民主，實際上製造麻煩，又話學生堅持人大撤銷政改決議係「難人哋（政府）所難」，奉勸大家回到現實，把握政改第二輪諮詢機會表達意見好過。
事實上，鄭耀棠所屬工聯會就佔中唔係冇發聲，好似早前保普選、反佔中大聯盟一連推動兩次簽名運動，工聯會都派出理事長吳秋北做前線代表，但鄭耀棠作為該會榮譽會長，佔領行動逾十周幾乎銷聲匿迹，聽見清場就即刻現身鎂光燈下，排隊講嘢博領功，同場出席活動嘅吳秋北惟有黯然離開，未有同鄭耀棠爭搶風頭。
同場嘅仲有全國人大常委范徐麗泰，被問到會唔會以人大常委身份向中央建議做啲嘢，令特區政府改善施政，范太隨即展現佢嘅「政治智慧」，話擔心會被曲解為要求中央干預港府施政，「咁大罪名我唔答得你問題o架！」抽水亦不忘錫身，拒絕墮入陷阱。
