一魚多名難分辨

剝皮魚扮「斑塊」

「好似老虎魚同細條石狗公個樣好似，但老虎魚（背鰭）有毒，被刺到會腫痛，市民一般好難分得到。」國際漁會聯盟主席杜光標指，除了老虎魚及石狗公，不少聲稱有「斑塊」的菜式亦有可能是由平價「剝皮魚」冒充的，「剝皮魚同斑嘅肉質好似，炒完炸完再食落口，漁民都分唔出，市民更加食唔出。」

餐飲聯業協會會長黃家和坦言，不少魚類「一魚多名」，市民揀選時可能一頭霧水。「好似比目魚，其實有人叫佢做鱈魚，但同銀鱈魚唔同。」他續指，吞拿魚其實即是金槍魚，亦有不少日式料理店稱之為「拖羅」。黃認為普羅市民難以肉眼分辨魚類，冀政府相關部門能加強執法，保障市民。