佔領禍港罪滔天 黑手唔該找數先

呢，早前多名市民入稟小額錢債審裁處，向淫賤黎、「佔中三醜」以及一眾學生領袖索償，截至目前為止，已經有起碼近二十宗畸士處理緊。

咁就啱嘞，打蛇打七寸，擒賊先擒王，佔領黑手喺幕後搞搞震，特別係淫賤黎，出錢出力不特止，更加當正自己揸弗人，日日喺金鐘「皇座」發號施令，唔追佢哋追邊個呀！不過咁，佔領搞亂香港，條數認真襟計，佢哋孭唔起嘅，好似餐飲業咁吖，佔領期間唔見咗三十億元，其他如零售旅遊等行業，損失到底有幾多，只有天曉得。有學者甚至推算，佔中將會令香港未來三十年損失一萬一千億元，所以話啫，佔領黑手破十次產都唔掂吖。

本來呢，出得嚟行，預咗要還，做得幕後黑手，就預咗第日要找數，點知淫賤黎居然扮晒蟹話「唔關佢事」，企圖甩身。最匪夷所思嘅係，佢竟然被剔除其中三宗訴訟。唔係啩，淫賤黎指點江山嗰陣又唔見佢話「唔關佢事」？正如有申索人話齋，如果淫賤黎唔係喺佔鐘區指揮群眾，就唔會畀人淋屎尿掟豬雜啦，一句「唔關佢事」就想推得一乾二淨，真係咪使旨意呀。

古人教落，盜亦有道，「入先，勇也；出後，義也」。淫賤黎叫學生上京衝擊，自己就匿埋後面等睇戲，家陣又砌辭卸責，正一無膽匪類。不過咁，其他搞手都唔好得幾多嘅咋，開頭講好自首承擔責任，到頭來唔係潛水龜縮，就係揀最輕嘅罪嚟認，做騷多於一切，講到尾咪又係博上鏡搶光環。有法官早排就講得啱嘞，即使目標有幾崇高都好，都唔可以踐踏他人權利，呢個係法治嘅最重要一環。一場佔領之亂，市民返工、返學、做生意甚至正常生活等基本權利正正被嚴重踐踏，淨係呢點都應該煮重班搞手米，更何況佢哋唯恐天下不亂，以搞死香港為己任，目標一啲都唔崇高。

正所謂，善有善報，惡有惡報，時候一到，統統都報。淫賤黎等人反中亂港，多行不義，都係時候算總帳嘞。咪話太一叮唔提醒，依家全世界都金睛火眼（目及）到實，司法當局如果又係高高舉起，輕輕放下，市民實唔肯過你o架，叮！