SUN搞作：打橫嚟講：完場
香港歷史上唯一的，也是最浩大的一次，終於，在「警民」雙方極度合作（或說「克制」），以極少武力和頑抗下「清場」落幕！
嗱！清場咋！故事未完o架！
金鐘佔領區最後一夜，突然人頭湧湧，大家爭相拍照、緬懷、堅守、打卡、食花生、搶光環，形形色色乜都有……
學民仔黃之鋒在大台上感言一句：「點解最後一晚先至最多人嚟嘅！」聽到呢句，心酸得淚也標出來！
香港人的劣根性，若不是三分鐘熱度，就係一窩蜂，連「愛心」和「抗爭」都係咁！就像街坊老店宣告執笠嘞！必然引來一大群「支持者」來「憑弔」幫襯，士多也好！文具店也好！戲院最後一場，即使映垃圾爛片，也見滿座！碼頭要拆嘞！住香港的人，亦搭最後一班船，坐去九龍見證歷史，咁就解釋了做乜最後一晚會有咁多「群眾」出現的奇景！
若這批「圍觀者」（不包括真心爭取無篩選選舉的鬥士們）肯全部留守（多一日已足夠），坐晒喺清場最前線，金鐘佔領區會有如此下場嗎？
當上月底，旺角佔領區被清場時，「金鐘人士」有乜行動支援過呢？縱然不是「隔岸觀火」，也可算是「無動於衷」囉！旺角是「擋刀」的最前線，頂不住躺下，滿身鮮血，金鐘、銅鑼灣仲會「命長久」嗎？
當大台上，有人呼籲全場「群眾」給掌聲畀自己時，我立即轉身離場。今時今日，係極度失敗呀！不是取得階段性勝利呀！我仍深信「民主不是被施予的！」而係沒有抗爭，就無改變的！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
