城中鏡：60高層唱聖誕歌 大摩籌款破紀錄
摩根士丹利搞聖誕唱歌慈善籌款，已經成為傳統。今年亦已經係大摩連續第十八年支持「愛心聖誕大行動（Operation Santa Claus）」，兼且係第十二年辦「摩根士丹利董事合唱團」，繼續大堆頭，召集大摩在港六十幾位MD（董事總經理）高層參與，而且又破籌款紀錄，有超過三百三十萬元善款捐畀「彩虹計劃」。
高浩灃（箭嘴示）帶領逾六十名董事總經理一齊唱聖誕歌籌款。
今次愛心聖誕大行動，尋日喺大摩總部ICC搞，由大摩今年新上任的亞太區聯席首席執行官高浩灃領唱，帶領同事贊助嘅逾六十位高層唱八首聖誕歌，全程由香港保護兒童協會嘅小朋友伴唱，大摩又整咗分貝測量器，量度喺在場人士嘅掌聲中選出最受歡迎嘅一組，所以現場夠晒聖誕氣氛。今次係大摩第二年為「彩虹計劃」籌款，主要為患有自閉症嘅兒童走出黑暗，而幫助小朋友亦一向係大摩全球援助服務嘅宗旨。
而大摩內部亦喺上星期先搞咗個焗蛋糕籌款，由大摩香港同事親手整愛心蛋糕同甜品，經內部網上拍賣競投，由於凡出價者，不論係咪投到都會捐出善款，所以由上周一至五，每日推出三至五款蛋糕，一共累積籌到九萬九千元，其中最貴嘅一個蛋糕投到三萬元，加埋今次MD合唱團善款，金額超過三百三十萬元，比舊年紀錄又多咗超過十萬元。
