城中鏡：台客融入香港 盧健英學粵語
香港台灣婦女協會早前舉行聖誕慈善派對，一眾台灣幫齊歡聚，台灣文化部駐港機構光華新聞文化中心主任盧健英都有到場，見佢精神奕奕，睇嚟好適應香港嘅生活。佢笑笑口話眨吓眼駐港已經一年幾，決定的起心肝學好廣東話，咁先至可以深入了解香港文化咁話。
盧健英（左二）決意學好廣東話，居港多年嘅賴李承美（左一）、台北貿易中心經理凌文華（右二）同陳愛蘭（右一）都支持。
「私人貸款之父」張炳煌夫婦定居香港近四十年，早已以港為家。
羅台秦（右一）同李阮錦鑾（左一）及陳陳燕兒a（左二）現身同樂，林華琴（右二）表歡迎。
咁啱最近文化部大地震，港人熟悉嘅部長龍應台同曾派駐香港嘅政務次長李應平同時辭官，令外界大感意外，梗係要問吓盧健英心情有冇受影響喇！佢好豁達話，官場有人來、有人走好正常，呢啲就係民主制度嘅常態，日子總要繼續過下去。講講吓，佢話打算學好粵語以融入香港生活，第一步就係唔准同事同佢講國語喎。
多辦活動吸引台灣姊妹
當晚仲見到台北經濟文化辦事處處長嚴重光、遠東貿易中心主任陳愛蘭、香港台灣同鄉會前會長賴李承美、保良局前總理兼亞洲聯合財務公司董事總經理張炳煌夫婦等人。剛剛當選中華廠商聯合會婦委會副主席嘅仁愛堂副主席羅台秦，亦邀請廠商會婦委會主席陳陳燕兒、第一副主席兼廠商會候任會長李秀恒太太李阮錦鑾等好友赴宴，同台灣婦女協會會長Judy林華琴等寶島姊妹交流吓。
Judy見到咁多好友去撐場勁開心，佢話今次以慈善晚宴形式過聖誕零舍有意義，日後將盡量舉辦多啲活動，吸引更多居港台灣姊妹歸隊，加入婦女會。
