政壇：搞搞政：中央計分評反佔中功過

有傳建制派同愛國陣營要就反佔中力度向中央交數，其中一個計分方法係計見報率，無論內容好定壞，總之見報率高就會有獎賞。咁唔夠乖嘅人有乜下場？大家應該記得，早前內地官媒點名批評香港富豪唔願意就反佔中表態，雖然之後極速刪除咗篇文章，但已足以令一眾富豪倒抽一口涼氣。因為公開要求特首梁振英下台而被褫奪全國政協資格嘅「田少」田北俊亦係一個人辦，但田少似乎未有吸取教訓，前排仲去佔領區探絕食嘅學生，唔知佢咁做會唔會連累黨友呢？

反佔中立場唔夠堅定嘅仲有立法會主席曾鈺成，佢近年在唔少政治議題上持中立態度，取態曖昧，中央早已看在眼裏。不過，佢早已表態會「裸退」，無心戀棧嘅佢，自然可以暢所欲言，中央亦奈佢唔何。

人大政協位勢爭崩頭

其實建制派有時都有口難言，尤其係接到惡啃「柯打」時，都唔知點做。例如警方喺九二八向學生掟催淚彈，搞到群情洶湧，有傳中央叫某建制黨派撐警方掟催淚彈，仲要狙擊佔領學生有意推動「顏色革命」。本來該黨已印好宣傳單張，但有人提醒咁做等於「政治自殺」，所以嗰排班建制派都潛晒水，結果單張都只係低調派發算數。

中央點樣論功行賞仲未知，但有人已忍唔住開口想撈番一官半職。區議會或立會議席雖然都唔錯，但有人對人大、政協睇高一線，事關唔使虛度光陰，應付議會嘅「拉布」文化，每年只需上京開幾次會，又有機會見國家領導人，其「性價比」比議員高好多喎！不過，人大同政協名額有限，睇嚟有排爭。