政壇：陳啟宗勸學生咪從商
經常語出驚人嘅恒隆地產董事長Ronnie陳啟宗，早幾年金融海嘯時，投資銀行界成為眾矢之的，Ronnie曾經公開話，最睇唔起投資銀行人，唔會畀個仔做投行，如果有女兒，都唔會畀佢嫁畀投行人。尋日佢出席「恒隆數學獎」頒獎禮時，又奉勸台下一班中學生，如果對數學有興趣，應該好似同場嘅「數學大師」丘成桐咁做學術研究，唔好學佢從商喎。
Ronnie話有能力嘅人應該選擇喺學術領域發展，唔叻嘅人先選擇做生意，仲話做學者好過做生意，可以將研究貢獻畀社會咁話。雖然佢講得咁有理想，但其實佢個仔陳文博早已喺恒隆學做生意。佢吹吹吓水，自爆尋日係佢六十五歲生日，仲話希望繼續做個「開心快活人」（a happier man）喎。
