政壇：短訊謝議員 星星欠誠意
幾經波折，討論咗成年時間，立法會財務委員會上星期五通過擴建將軍澳堆填區撥款申請，今日會繼續審議擴建其餘兩個堆填區同興建焚化爐嘅撥款申請，預計今日可以完成表決擴建打鼓嶺堆填區。由於泛民主派議員就議案提出大量修正議案，又不時提休會待續同中止辯論拖時間，搞到一班建制派議員成日都要喺會議室坐定定撳掣投票。最後財委會有驚無險通過有關撥款，有建制派議員私下批評環境局官員淨係傳個大圍答謝短訊畀佢哋就算，覺得對方無乜誠意。
設計圖片及對白
有建制派議員話，雖然由環境局局長「星星」黃錦星為首嘅環境局官員投票前，喺將軍澳推出大量補救措施，希望可以紓緩一直困擾當區嘅臭味問題。不過，環境局雖然有效減少當地反對聲音，但就甚少接觸議員箍票。
直至財委會通過擴建將軍澳堆填區撥款申請之後，環境局淨係向投咗贊成票嘅建制派議員傳咗個大圍答謝短訊，多謝佢哋連日留守議會，令撥款順利通過。由於嗰個答謝短訊無寫任何抬頭，有建制派就覺得環境局連多謝人都無乜誠意，好似搞到建制派投贊成票係應分。
「莫非要請食飯先夠皮？」
雖然環境局之前經歷幾次「甩轆」，包括發生終止待續及否決活化已復修堆填區計劃同小蠔灣廚餘回收中心，但公道啲講，佢哋今次拉票表現的確較以前有進步，改為派出政治助理Michelle區詠芷企喺會議室門口謝票，星星會後更加多次同建制派議員握手鞠躬。
Michelle就話，佢哋三位問責官員同常任秘書長王倩儀都有各自發答謝短訊畀啲議員，話可能有議員誤會咗。既然環境局已經做到呢一個地步，如果有人仲係覺得佢哋做得唔夠好，莫非要逐一請佢哋食飯先至夠皮？
另外，就兩個堆填區同興建焚化爐嘅撥款申請提出大量修訂議案嘅公文袋議員陳家洛，昨日去信財委會主席張宇人，要求主席喺裁決刪除佢提出嘅修訂議案前，先諮詢法律意見，並要求書面解釋。
