有人話，見到青年人輪候公屋大排長龍，就知點解佢哋會甘於淪為佔領行動嘅炮灰。如果呢個觀察係正確嘅話，咁香港都幾難有運行咯，點解？咪就係港府嘅公屋建屋大計隨時爛尾囉，苦候上樓嘅人龍愈嚟愈長，民怨愈嚟愈深，社會好似活火山咁，想唔家無寧日都難喇，吓話！

公屋係弱勢社群嘅避風港，亦係社會安定嘅房角石，所以港府嘅十年建屋大計之中，訂下共建二十萬個公屋單位目標，安撫人心。可惜，港府從來係說話嘅巨人，行動嘅侏儒，做起上嚟完全係另一回事。嗱，房委會最新數字顯示，未來五年只有七萬七千個公屋單位落成，即係距離十萬個單位建屋目標尚欠二萬多個，你話係咪大隻講吖。

有數得計，如果十年建公屋二十萬個目標不變，當局就要喺第六至第十年間興建十二萬個單位追數，情況有幾嚴峻，可想而知。講真，港府覓地建屋阻力重重，寸步難行，大家早就有目共睹，十年建屋大計講求一氣呵成，前五年都無法達標，後五年要超標追數喎，砌積木就得！

所以話，港府無能，十年建屋大計隨時又係另一座施政爛尾樓嘅咋。最可憐係基層市民，公屋落成步伐落後大勢，勢必拖慢上樓時間，無殼蝸牛上樓無期，只能夠繼續望天打卦，苦苦掙扎。日前有外國傳媒濃筆重墨報道香港天台屋狀況，喺特寫鏡頭之下，港式貧民窟嘅畫面係何其震撼，而人形沙甸魚嘅辛酸又係何其淒涼。市民連搵個安身之所都咁難，難怪社會愈來愈躁動喇，照咁睇嚟，佔領、「鳩嗚」等嘅街頭政治暴力層出不窮，唔應該只怪罪示威者，港府更加應該自我反省，香港唔係冇地，更加唔係冇錢，點解搞到咁多無殼蝸牛望樓興嘆！

講到呢度，大家可能會產生兩個疑惑。紐約同上海等城市同樣人口密集，點解居住環境比香港寬敞咁多？建屋安民係長遠大計，點解港府成日呻地從何來？老實講，對於第一個問題，好多睿智之士都解釋唔到，唯一可能性係香港嘅官僚特別蠢過人啩；至於第二個問題咯喎，答案非常簡單，就係多得前特首貪曾帶挈嘞。正正因為佢任內胡混度日，搞到土地儲備空空如也，結果咪令房屋問題積重難返囉。正所謂，冤有頭，債有主，各位無殼蝸牛打小人時，知道頭號目標係邊個啦，叮！

第一手消息請下載on.cc東網iPhone/iPad/Android/Windows Phone Apps