城中鏡：名人防騙各有妙招
電話詐騙集團愈嚟愈猖獗，早幾日就有一名騙徒唔好彩打咗去警署行騙，結果畀機警差人布局逮捕。講起防騙，城中名人各有妙招。福建幫頭領楊孫西兒子Johnny楊華勇話，家人嘅姓名資料同行蹤十分公開，若收到可疑電話最緊要自己夠警惕，聽完就算。中華總商會會長楊釗就醒大家四字真言「便宜莫貪」，佢仲話電話多數飛晒畀助理，故極少遇到電話詐騙喎。
楊華勇話網上好易搵到名人資料，須格外小心。
楊釗奉勸大家便宜莫貪，就可減受騙機會。
張敬山曾經智退電話騙徒。
Johnny話曾經收過唔少陌生人電話，佢哋都講得出佢嘅近況、往事甚至家人姓名。佢話呢啲資料喺網上輕易搵到，所以見怪不怪，聽完就算。香港菁英會前主席洪為民亦曾收到陌生人來電，問佢有冇興趣睇睇一批走私古董，當時佢扮有興趣，仲畀咗公司地址叫對方上嚟，之後即刻報警，不過騙徒最終冇出現。
「救人唔使用錢嘅」
家族做電訊生意嘅馬主張敬山就話，曾經收到一個內地電話，對方聲稱畀內地公安扣留，急需佢幫忙用錢贖佢出嚟。佢聽完之後得啖笑，同對方講：「救你唔使用錢嘅，你講間公安局地址畀我聽就得喇！」對方聽完就即刻收咗線。
面對手法日新月異嘅電話騙案，篤信佛教嘅楊釗就提醒大家「便宜莫貪」，佢平時聽到廣告或宣傳電話就會立即收線，萬一真係有人向佢呻有財政困難，佢就會叫人搵中總旗下嘅相關部門商量，睇吓點解決。不過，佢嘅電話多數飛晒畀助理，要遇到電話騙案都幾難。
