SUN搞作：打橫嚟講：香港人，永遠的輸家

香港廢柴政府與土共建制派不顧祖宗十八代菊花爆開都力推「假普選」方案，佢哋話可以畀香港七百萬人有「一人一票」選特首（其實，投票數量只得二百鬆啲萬而已！）有趣的地方，就係若真係「一人一票」選特首的話，今屆的特首想連任便肯肯定凍過水，相反，如果「831政改方案」否決咗，用番「原地踏步」的舊選舉方式，今屆特首又無「被佢阿爺嫌棄」，佢連任機會肯肯定坐定粒六也！

趣致而兇險的，係政府二線高層瞓身推動「一人一票」之「假普選」乃大家明解之餘，亦見有內幕公然洩露，話泛民議員有轉軚，到時不跟大隊投票，咁即係「831政改方案」有機通過？今屆特首連任咪有難度？咁洩秘打開口牌做乜呢？

另一方面，更妖異的，是泛民若爭取「無篩選之真普選」不成功的話，會被迫用回「原地踏步」之舊方案，咁！下屆特首選舉，又見「含淚接受」囉喎！

下次特首選舉是兩年半後之事，遙遠得無人知！但一個挑撥分化性的「謠言」，今日就令那些自知會被視為係鬼的泛民議員撲出嚟「表白」，誓神劈願示堅貞，一定否決「人大831政改方案」。我絕對信任這批精忠的泛民朋友。但世事確實無常，如果投票一刻，真的當下「轉軚」，令「假普選方案」通過咗，米已成炊，香港人咬你食嗎？確實，有議員（係民建聯的）曾撳錯掣的前科喎！嗱！為安全起見，唔知全體泛民議員（只要投反對票的其他派系也准加入），可否在有醫生和律師見證，以精神狀態正常下，立訂一份遺囑式的合約，即使人唔在，都證實你一定投否決「831方案」，咁就唔怕你當日去咗旅行不在港、阿媽入廠、塞車困升降機趕唔切，甚至自己飲漂白水入院或畀人綁架啦！最好投票前一夜，全體留守立法會等天光投票，無藉口出亂子。

政治太卑鄙無恥了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府