政壇：搞搞政：謝凌過檔拍高永文
政圈一直盛傳，教育局常任秘書長謝凌潔貞同局長「吳得掂」吳克儉唔咬弦，所以早就想轉換吓新環境，奈何一直搵唔到「好歸宿」。依家謝凌終於可以拍住民望一直遙遙領先嘅食物及衞生局局長高永文，撇低好唔得掂嘅吳克儉喇，真係要偷笑。謝凌咁好彩係因為食衞局常秘黎陳芷娟任職超過四年半，夠晒鐘調職，所以兩人對調都係一個適切嘅安排。
設計圖片及對白
但有人就質疑食衞局嚟緊將要處理唔少燙手山芋，包括自願醫保計劃、對美容業同私家醫院嘅規管等等，仲有各種傳染疾病嘅防控措施等，樣樣嘢都好棘手。謝凌雖然係資深嘅官員，但係佢從來都未接觸過同食物安全或醫療相關嘅工作，難怪有人擔心佢未必可以勝任，可能會搞到高永文好頭痛！
不過，事實上，黎陳芷娟原本喺食衞局負責漁農、食物安全、禽畜公共衞生同環境衞生政策，有關醫療及衞生嘅政策係由另一位常秘袁銘輝負責。
相比之下，謝凌要處理嘅工作又唔係咁繁重，亦冇袁銘輝所負責嘅咁具爭議性，所以依家談論謝凌係咪能夠勝任，可能真係言之尚早。
局長勤力啱嘴形
講番謝凌對吳得掂最大嘅不滿，就係吳得掂成日外訪或放大假，搞到謝凌要獨自孭鑊，相信佢成功「轉會」後，就可以開心笑喇！事關高永文出晒名勤力，事事親力親為，唔止唔會成日放大假、玩失蹤，就算公務外訪都會盡早返港。照咁睇，謝凌同高永文發生衝突嘅機會應該會少啲喇！
