政壇：張超雄長毛惹cut證疑雲
多名泛民議員公然濫借立法會大樓設施畀佔領人士享用，例如帶示威者去議員用嘅浴室沖涼、長期霸住會議室瞓覺咁。立法會行政管理委員會上星期決定咗用「三招」去制止呢啲濫用情況，而喺金鐘佔領區全面清場前夕，社民連「長毛」梁國雄同工黨張超雄嘅議員證突然失效，佢哋起初以為因濫用立會設施被懲罰，後來先知係一場誤會，撞正所屬樓層嘅電子門集體失靈。
張超雄被困期間一臉無奈，一度以為議員證權限被取消。（互聯網圖片）
尋晚七點幾，長毛同張超雄喺十樓辦事處突然被困，電子門全部開唔到，佢哋起初以為因濫用立會設施被罰，連張議員證都被取消，有人仲估係咪佔鐘區清場前夕，立會提前做「保安升級」，後來連嚟「營救」佢哋嘅保安都開唔到道門，先知係電子門集體失靈，最後歷時一個鐘多啲，佢哋先重獲自由。據知被困期間，張超雄因辦公室一早上鎖，不得其門而入，相反長毛因長期唔鎖門，仲可以自由出入辦公室。
