政壇：外籍英師量少效低田二少質問「吳得掂」
話說政府喺十年前開始推行「以英語為母語的英語教師計劃」，為每間合資格小學聘請一名以英語為母語嘅英文老師，希望可以為學生哥提供英語語境。曾任語文教育及研究常務委員會主席嘅立法會議員「田二少」田北辰就話，計劃實行以嚟學生英文水平未有顯著提升，質疑計劃成效低，仲問教育局局長「吳得掂」吳克儉唔肯增聘母語為英語嘅教師，究竟係冇錢定有錢唔肯用？
田北辰建議所有小一英文堂都由英語為母語教師任教。
田二少話根據《全港性系統評估報告》，過去十年間，小三學生嘅英語達標率只上升咗四點四個百分點，而小六學生就只係上升一點九個百分點，質問吳得掂點解一間學校只係請一位英語母語教師咁少，佢仲建議所有小一英文堂都由英語為母語嘅教師任教。
吳得掂就死撐話，學生英語水平達標率唔係評估有關計劃嘅唯一因素，又話唔增聘英語為母語教師，唔係因為錢嘅問題，而係教育生態問題喎。
