政壇：范國威港人優先議案犯眾憎

立法會尋日討論由新民主同盟范國威提出、要求政府制訂政策時須以「港人優先」為依歸嘅無約束力議案。雖然范國威嘅議案最後一如所料被否決，四名議員提出嘅修正案亦都全軍覆沒，但屬於泛民一分子嘅范國威，連同佢自己在內，合共僅得四名泛民議員支持，但反對票就多達三十一張，唔知佢使唔使檢討下，點解會搞到如斯田地呢？

泛民同建制派議員發言時都鬧爆范國威（右）不知所謂。

被批「狹隘本土主義」

泛民同建制派議員喺發言時，齊鬧爆范國威同公文袋毛孟靜不知所謂，其中建仔李慧琼批評依家中港摩擦尖銳，有人唔去搵解決辦法，反而將內地妖魔化，挑起港人仇視情緒；商界議員廖長江都批評今次議案背後係極為保守、狹隘嘅本土主義。

保安局局長黎棟國回應時否認單程證制度漏洞百出，指新來港人士有效補充香港勞動力，批評范國威嘅講法以偏概全。勞工及福利局局長張建宗亦話新來港人士教育水平有上升趨勢，加上輸入外勞只屬臨時短暫安排，認為唔會進一步挑起兩地矛盾。