佔領運動發生以嚟，立法會大樓嘅示威區就一直畀示威者霸佔，仲擺咗唔少帳篷喺度，搞到立法會原定下個星期舉行嘅火警演習，都要將疏散集合地點由往常嘅立法會廣場改去添馬公園，變相令演習走晒樣。咁啱尋日立法會發生一場火警虛驚，好彩只係一場誤會，唔係就變做演習真人騷喇！

大批人員圍住疑似冒煙嘅技術室，結果虛驚一場。

事緣立法會人事編制委員會原定尋日早上喺立法會大樓會議室開會，點知開會前，會議室內嘅技術室傳出冒煙消息，保安人員仲攞埋小型滅火筒過去，大批人員圍住現場，氣氛好緊張。好彩檢查後，只係技術室嘅電子裝置故障，令會議室嘅視像系統未能如常運作啫！

雖然火警只係虛驚一場，但係一班議員就未能準時開會，要移師另一會議室去開會。點知呢間會議室冇電子投票系統，議員表決時要靠原始嘅舉手，仲要勞煩秘書處職員幫手數人頭，真係甩晒轆。

第一手消息請下載on.cc東網iPhone/iPad/Android/Windows Phone Apps